Fyrir þá sem vilja hafa allt á hreinu getur verið gott að styðjast við eftirfarandi 12 mánaða skipulag. Þau tímamörk sem hér eru gefin upp eru þó langt í frá heilög og eru meira hugsuð til viðmiðunar. Mundu bara að þegar þú ert farin að þylja gestalistann upp úr svefni er kominn tími til að slaka á og gleyma brúðkaupinu um stund.

 6-12 mánuðum áður

• Fastsetja brúðkaupsdaginn.
• Tala við prest eða sýslumann.
• Panta kirkju.
• Ákveða hverjir verða svaramenn.
• Ákveða hvernig brúðkaup og veislu skuli halda og gera fjárhagsáætlun.
  
• Útbúa gestalista.
• Panta veislusal og veitingar.

 4-6 mánuðum áður

• Athuga með brúðkaupsferð.
• Skoða og jafnvel pantabrúðarkjól.
• Athuga með föt á brúðgumann og brúðarmeyjar og -sveina ef það á við.
• Ákveða tónlist og fyrirkomulag í brúðkaupinu í samráði við prestinn. Bóka skemmtiatriði fyrir veisluna.
• Panta snyrtingu og hárgreiðslu.
• Panta gistingu ef verja á brúðkaupsnóttinni á hóteli.
• Fá vottorð um hjúskaparstöðu hjá Hagstofunni.
• Kaupa giftingarhringa.
• Ef þið ætlið í brúðkaupsferð athugið þá hvort þið þurfið að láta bólusetja ykkur.

 4 mánuðum áður

• Láta útbúa boðskort og söngskrá fyrir gestina. Ef nota á þakkarkort er ágætt að láta prenta þau um leið og  boðskortin.
• Raða gestum til borðs og útbúa nafnspjöld á borð ef það á við.
• Panta áletraðar servíettur.
• Panta brúðartertu.
• Panta brúðarvönd, blóm og skreytingar.
• Ákveða ljósmyndara og panta myndatöku.

3 mánuðum áður

• Staðfesta allar pantanir.
• Staðfesta brúðkaupsferð.
• Gera ráðstafanir varðandi brúðarbíl.

 1 mánuði áður

• Senda boðskort. Gott er að merkja við hvern og einn á gestalistanum þegar viðkomandi staðfestir boðið.
• Láta skrá nöfn hjónaefnanna á gjafalista hjá verslunum.
• Athuga hvort brúðarkjóllinn sé tilbúinn. Skipuleggja hverjir munu ganga um beina í veislunni.
• Ganga brúðarskóna til svo að þeir meiði ekki á sjálfan brúðkaupsdaginn.
• Fara í hárgreiðslu- og förðunarprufu (í kjólnum og með slörið).

 Gott er að fjárfesta í stílabók eða plastmöppu þar sem allar upplýsingar og minnisatriði varðandi brúðkaupið eru geymd á einum stað.

• Í vikunni fyrir brúðkaupið er mælt með því að fara yfirlokaskipulag með veislustjóra, veitingaþjónustu og öðrum sem koma að skipulagi brúðkaupsins.
• Daginn fyrir brúðkaupið má m.a. nota til að lakka neglur. Sé brúðurin orðin illa farin af streitu er einnig upplagt að skella sér í smádekur á snyrtistofu, t.d. handsnyrtingu eða slökunarnudd.
• Njóttu brúðkaupsdagsins – hann rennur jú ekki upp á hverjum degi! (Nema þú sért latínubomba með eigið vörumerki og heitir Jennifer Lopez.)

Höfundur: Heiðdís Lilja
Grein úr Nýju lífi